如何應付新任父母？

去到 Rosie 這個年紀，身邊不少朋友開始結婚，有少數幸運的一群 (真係幸運？唔....) 甚至已育有一兩件小魔怪。雖則 Rosie 平時以直率自居，但為了應付一眾以及將會越來越多的新任父母，實在是時候要學懂說(大)話的藝術。

需知道，每個寶寶在父母眼中都是 perfect 的。你膽敢直腸直肚說他們的小天使唔可愛、唔靚仔/女、唔健康、唔醒目？大概可以做定心理準備與這對父母絕交，又或等收律師信被告誹謗了！因此，作為一個討厭小朋友但又虛偽到暈的成年人，每次探訪初生 BB 都是一場考驗。

老實說，大部份初生 BB 都如一堆粉團，又有多少個真的天生美人胚子、又或似再世潘安？為何父母們總不肯承認這個事實呢？唉..... 即使Rosie 再偽善，但要對著一堆粉團大讚可愛、靚仔，情況等如你要 Rosie 緊緊抱住 Hello Kitty 毛公仔，然後大叫 kawaii一樣，不如殺死我啦！不過，Rosie 發覺大部份新任父母都已幾近瘋狂的地步，只要你肯發掘一下 BB 的特徵，再稍微誇張，連帶祝福一下 BB 的璀璨將來，所有又盲又聾的爸爸媽媽都一定收貨。技巧與你平時擦老細鞋一樣，BB 樣貌再不濟，眼耳口鼻都總有一樣比較順眼的。

Rosie 虛偽實況如下︰
1. 咦？你對眼仔好大喎，第時一定好精靈喇！

2. 唔...你眼仔懞懞咁，好 kawaii 呀！
3. BB 嚟講，你個鼻都算高喎，輪廓夠哂分明。
4. 口仔細細咁，你唔怕食窮郎啦。
5. 你個口仔咁大，醒呀，唔怕爭唔到奶食！
6. 嘩，你啲頭髮好多好黑，好似椰菜娃娃喎！
7. (講無可講) 你對耳仔好貼面喎，第時一定好聽話架喇！
8. (再嚟) 你額頭夠高，睇相佬話讀書會好聰明架！

遇著某些 BB 樣貌真得太慘不忍睹，Rosie 建議你將視線轉移去佢其他部份︰
1. 你個樣好似媽媽/爸爸喎！ (呵呵，順勢話埋佢阿爸阿媽醜樣，出返啖氣~~~)
2. 你啲手仔腳仔好肥喎，啲肉仲實頂頂咁，好健康呀！
3. 嘩，你都幾重幾"聚"手架喎！
4. 唔...佢啲手手腳腳咁長，第時實好高啦，成個Model 咁款。
5. 佢啲手指咁長，有冇諗過俾佢學琴呀？ (將父母思緒帶離目前的困局)
6. 佢瞓覺果樣好可愛！ (哈哈，唔知呢個算唔算係讚美~~~)
7. BB 咦咦吖吖咁，實好快學識講野啦！ (實情Rosie 最憎小朋友嘈吱巴閉)
8. (靜默五秒)....呀.....唔......BB 都好多表情下喎，哈哈哈 (呢個係Rosie 親身經歷，面對父母屏息 靜氣、極度期待的眼神，無辦法唔作啲野交下差，否則無法打破僵局。)

幸好，Rosie 前兩天探望的BB 女是個罕有的美女，眼大大、面圓圓、頭髮濃密、安靜、愛睡........Thank God!!!!!!!!!!!!!!