十大港鐵惡人

排名不分先後︰

1. 橫衝直撞人

拜託，擺明見到車門已經關緊、擺明見到裡面嘅人已經逼到不似人形，而閣下亦非趙飛燕能跳掌上舞的話，拜託不要再在關門時衝入車廂、再凌空跳起、用背脊把所有人向後壓，好嗎？閣下用背脊"得"住全世界，眼不見不代表無問題，你知道後面有多少人因為你圓渾的身材而被擠壓得要命嗎？你知道車門和幕門因為你無法收好凸出的肚腩 /手腳 /手袋皮包而重覆開門關門多少次嗎？

拜託，港鐵在繁忙時間平均1至2 分鐘已有一班車了。

2. 唔睇報紙一陣會死人

Rosie知你關心時事，但當大家都逼到想爆粗嘅時候，請問閣下仲係咪需要揚到份報紙咁大去睇呢？知唔知你份報紙會撩到人又痕又煩呢？知唔知我今日著咗件白色衫，好怕被報紙啲油墨整污糟呢？知唔知如果唔係你堅持要張開份報紙，車廂會多好多位，俾多幾個趕時間返工嘅心急人上車呢？你睇報紙都係想吸收知識啫，麻煩學下點樣做一個有公德心嘅人先。

3. 執輸爭位慘過敗家人

當全世界都要企，突然有位坐的確好吸引。不過只要Rosie 見到你露出貪婪而不顧一切的眼神，其實都已經會識做讓路。你真係無必要起勢批踭、撞開我飛撲埋個位度架噃。坐低咗，仲要嘴藐藐、眼超超，嫌我之前阻住你？你無嘢下化！

4. 粗口人 / 雞蟲人

粗口已經演變成助語詞，無辦法戒得甩？斷估你唔會對住老細 / 女朋友阿爸阿媽 / 見工途中 / 拜年都照講粗口啩，咁麻煩你喺公共車廂都收斂少少。唔係叫你零粗口，但左一句9、右一句7、頭一句兮、尾一句老母，真係好礙耳。係咪最起碼可以細聲少少呢？

另，各位北上尋歡嘅雞蟲們，Rosie 真係無興趣知你琴晚上咗條咩索女 / 索女三圍數字 / 白白淨無性病 / 點樣瞞住老婆上去搞搞震 / 無帶套好鬼爽 / 點樣高潮起伏 / 各自施展渾身解數。呢啲野你留返同骨精強講OK 啦，無必要公諸同好 。車上面仲有好多小朋友，性教育 "笨"唔係咁樣架！

5. 朋友無分彼此人

照顧朋友係好，有福同享更係好到極。但你個 friend 唔等如我個 friend 喎，成排櫈明明只坐得四個人，你硬係要同朋友一齊分享的話，咁麻煩叫佢坐你大脾啦，坐唔落第五個架喇。Rosie 個豪華臀有返咁上下份量，仲要逼埋逼埋讓半邊身位俾你同人有福同享呀？我好難受架！

再者，若然Rosie 唔係慣性低頭睇書，望唔到附近有婆婆公公孕婦傷殘的話，無論Rosie 再衰都一定會讓位嘅。你唔駛起勢推個當事人企係我面前，然後又用言語暗示架喎。同埋，你事後果兩聲「唔該」好假囉！

6. 霸位人

個位係俾人坐，行李麻煩放地下啦。大家都俾咁多錢，點解我要企，而你啲行李可以坐？Rosie 年中都幫人拎起唔少報紙 / 手袋 /行李 /貨，絕對唔想下一個係你，更加唔會俾你啲大模斯樣同眼啤啤凶到囉。

7. 疑似色魔人

作為男人查實有啲蝕底，好容易被當成色魔辦，不過有啲情況真係可以避免。架車咁逼，係咪一定要郁身郁勢呢？對手係咪可以定落嚟，唔好一時摸頭、一時拉衫、一時摷袋、一時整MP3？不如插下袋、捉住扶手，再唔係撬埋都OK 喎。個身亦可以企直少少，唔駛左挨右傍丫。對眼都俾啲面減兩分淫邪啦。雖然男人身材係橫啲，但你老遠都見到我行埋嚟架啦，點解唔可以互相讓一讓，總係鍾意撞埋嚟呢？Rosie 願意相信你係好男人，但麻煩你都 be a gentleman丫！

8. 柱男柱女

扶手係用對手去扶，並唔係用個身去挨。你挨住咗，其他人點樣扶呢？Rosie 扶唔到，結果失平衡跌親，你又會唔會可憐我或者賠醫藥費？咪怪Rosie 起勢鑽隻手入去扶、仲要屈起手指"銳"你！

9. 聲污染人

你可以打機、聽收音機、用MP4 睇戲，Rosie 無權阻止，不過呢個世界有耳筒，駛唔駛我教你用？Rosie 真係唔想聽你睇緊咩戲呀！！！

10. 無聊人

搭車咪搭車囉，你講咁多野為乜？人地衰人地事，唔搞到你就算啦，扮咩正義之士數十大港鐵惡人？話緊你係無聊人呀Rosie!